Romans 14

Mua Maneka mua kui-kuisow kema wieya nain ookowa-ke

1Aria mua oko Mua Maneka opora wiar miimiya, ne sira ookowa-ke kema pinariya. Mua naap nain pun aawep kemena-pa wueka. Me o sira nain ariman wiar maemi oporiw iraku naep aawiman, weetak. Ni aawep-pueka. 2Feenap, mua sira erup-pa ikemik, mua oko maa sira-sira nain momor enimiya. Ne mua eena sira ookowa kema pinariya nain maa eneka enowa emi wame wuiya. 3Naeya mua eena maa momor enimiya nain-ke mua oko firekami me tuuninok. Neemi mua maa eneka me enimiya nain pun naap, mua oko nain me wiar maemi tuuninok. Moram Mua Maneka os pun aawep ona teeria-pa wuak. 4O Yeesus Krais teeria-pa ikua. Naeya o baliwep ikaiya-i e weetak, ona woos mua nain-ke mainon. No mua kamenapeya o main? Yiena Maneka Yeesus ona asipeya kekanep Mua Maneka sira baliwep wiar ookinon.

5Ne maa oko pun feenap, mua oko-ke maiya, fofa papako maneka, papako oram-ke. Ne mua oko-ke maiya, fofa unowa iiwawun naap manekiw. Nain ona mua kui-kuisow woosa kamenap wuap ookam-ikainok. 6Mua eena fofa maek nain Mua Maneka kema suuwowa naep naap maek. Ne maa enowa iiriw maem pun naap, mua eena maa momor enimiya nain Mua Maneka sira eliwa naakep maa nain enimiya. Naap onami Mua Maneka unuma purupiya. Ne mua eena maa papako fariariya nain pun naap, Mua Maneka sira eliwa naakep maa enimiya. Sira naap onami Mua Maneka kema suuwap unuma purupiya.

7I unowiya Mua Maneka kema suuwap maa onimik. Moram i mokok enuma ikemik fain yiena kookalowa ookowa-ko me ikua. Ne umowa pun me yiena maa-ke, iir kain umiyen, ne kamenap umiyen, i me amisaremik. 8Ne i mokok enuma ikemik fain, i Mua Maneka unuma fakeru naep maa onimik. Ne umowa pun naap, i umimik nain Mua Maneka ona maa-ke. Naapeya i mokok enuma ikemik fain ne umimik nain Mua Maneka wapena-pa wiar ikemik.

9Krais muut nain umep ikok iikirak. Naeya os-ke wi mua umimik nain ne mokok enuma ikemik nain wia urufam-ikaiya. 10Naapeya no moram nena teeria epaskun sira wiar tuunin? Ne moram mua oko sira wiar firekin? I naap onowa-ko me ikua, moram i unowiya wiimar Mua Maneka eena pokap yia mekawiya neeke wiar imenaremkun ona yia mekawap sira yiar mainon. 11Yo naap maem, moram Mua Maneka opor ara oko feenap ikua,

“Yo Mua Maneka-ke maiyem, makena yo anane ikaiyem. Naeya mua unowiya yo miir onoma-pa keema muuna mikikuan. Ne mua unowiya maikuan, ‘Mua Maneka no naisow maneka, yia urufami yia mekawin.’”
(Aisaiya 45.23)

12Naapeya yo feenap maiyem, i kema kamenap wuap sira onamik nain fofa neeke mua kui-kuisow Mua Maneka ona maakemkun ona yia mainon.

13Naapeya yiena teeria epaskun wia tuunowa nain piipuikua. Ne yiena sira yiam pupep maikua, “Yo sira kamenap onamkun wi urufap me oro-boonuk,” naap maiyen. 14Yo yiena Maneka Yeesus kema wiar ikok amisarep maiyem, maa enowa muutiw mua kuisow pina-pa me wia wakiowawiya, weetak. Nain mua oko mainon-na, “Aa, maa fain eliw marew, yo eniminen-na pina oninen.” O naap maep enowa emi wame wuinon. 15Makena, maa momor enowa nain nena maa-ke. Nain nena teeria epaskun nain sira nefar urufap kema samorarek. Naap nain no teeria epaskun kema suuwowa marew maa onan, o me kookalep maa naap onan. Naapeya nefa maakiyem, Yeesus Krais o naep umok, naapeya no mua nain me samore. 16Neemi no maa kema suuwap one. No maa eliwa-ke naep onan, nain oko wi papako-ke samora-ke naep nefa tuunikuan. 17Baliwep kema suuwap maa one, moram Mua Maneka pika kemena-pa wiar ikowa nain maa enowa nain me maa maneka-ke, Ewar Eliwa-ke kema yieya sira kakeniw ikowa, kema sonoma ne eliwiw ikowa sira makena-ke. 18Moram mua eena Krais kema suuwap sira naap ikaiya nain Mua Maneka-ke sira eliwa nainon. Neemi wi mua pun o sira nain urufap wiar kookalikuan.

Maa unowa Mua Maneka kema suuwap onowa-ke

19Naapeya maiyem, i sira eena pokow eliwa yiiya nain opa-afuriyen. Neemi yi-yieniw yiam kekanowam-ikok kekanep Mua Maneka sira ookiyen. 20Mua Maneka mua nain aawep asipam-ikaiya, ne i maa enowa muuta nain naap onami me oro-boonikua. Makena, enow unowa nain kuisow enep sira puukowa-ko me ikua. Nain maa enowa eena mua oko enowa emi maek nain no me wiar kema suuwowa ikip eniminan-na mua nain-ke kema pinarep samorarinon. 21Naapeya maa eneka me enowa ne eka kekanowa me enowa, ne sira kamenap onowa nain maa marew, nain nena teeria mua oko pina-pa me wakinok naep-na me one. 22Ne ni Mua Maneka naep sira kamenap kema wuiman nain kakeniw naap niar ikainok. Mua eena maa nain eliwa-ke naep onam-ikok kema unu-unowa me wuiya nain o kema eliwiw ikainok. 23Ne mua-ko mainon-na, “Yo maa nain enep Mua Maneka sira wiar puukinen-yon.” Kema ere-erup naap arep ikok eniminon-na pina-pa wame wuinon. Aria i maa onowa kema suuwam-ikok maa nain me eliwa-ke naep kiiriw oniyen-na pina-pa yiam wuiyen.